ଭୁବନେଶ୍ୱର : ଭୁବନେଶ୍ୱରରେ ପହଁଚିଲେ ଦୁଇ ଓଡ଼ିଆ ବୀର ସହିଦ ଯବାନ ପ୍ରସନ୍ନ କୁମାର ଓ ମନୋଜ କୁମାର ବେହେରା । ଦେଶ ପାଇଁ ଜୀବନକୁ ବାଜି ଲଗାଇ ଆଜି କଫନରେ ଫେରିଲେ ଦୁଇ ଓଡ଼ିଆ ଯବାନ । ସେମାନଙ୍କ ମରଶରୀରକୁ ଦିଲ୍ଲୀରୁ ଏକ ସ୍ୱତନ୍ତ୍ର ବିମାନ ଯୋଗେ ଅଣାଯାଇଥିଲା । ସହୀଦଙ୍କ ପାର୍ଥିବ ଶରୀର ଭୂବନେଶ୍ୱର ବିମାନ ବନ୍ଦରରେ ପହଂଚିବା ପରେ ସହୀଦ୍ ଅମର ରହେ ଧ୍ୱନୀରେ ପ୍ରକମ୍ପିତ ହୋଇଥିଲା ସମଗ୍ର ପରିବେଶ । ସହୀଦଙ୍କୁ ଶେଷ ସଲାମ ପାଇଁ ସିଆରପିଏଫ୍ ପକ୍ଷରୁ ଭୂବନେଶ୍ୱର ବିମାନବନ୍ଦରରେ ସ୍ୱତନ୍ତ୍ର ବ୍ୟବସ୍ଥା କରାଯାଇଥିଲା । ଶ୍ରଦ୍ଧାଞ୍ଜଳୀ ପରେ ଦୁଇ ସହୀଦ ଯବାନଙ୍କୁ ସେମାନଙ୍କ ଗାଁ କୁ ନିଆଯିବ । ଜନ୍ମମାଟିରେ ଜଳିବ ସେମାନଙ୍କର ଚିତା । ସୂଚନାଯୋଗ୍ୟ, ଗୁରୁବାର ଜମ୍ମୁ-କାଶ୍ମୀରରେ ପୁଲଓ୍ୱାମାରେ ଆତଙ୍କବାଦୀଙ୍କ ଆତ୍ମଘାତୀ ଆକ୍ରମଣରେ ୪୦ ଜଣ ଯବାନ ସହିଦ ହୋଇଥିଲେ। ସେମାନଙ୍କ ମଧ୍ୟରେ ଥିବା ଦୁଇ ଓଡିଆ ବୀର ହେଉଛନ୍ତି ଜଗତସିଂହପୁର ଜିଲ୍ଲାର ପ୍ରସନ୍ନ କୁମାର ସାହୁ ଏବଂ କଟକ ଜିଲ୍ଲାର ମନୋଜ ବେହେରା । ସମଗ୍ର ଅଂଚଳବାସୀ ଏବେ ଅପେକ୍ଷା କରିଛନ୍ତି ମାଟି ପାଇଁ ଗର୍ବ ଆଣିଥିବା ଏହି ଦୁଇ ଓଡିଆ ବୀରଙ୍କୁ ।