Home ଖେଳ ଆଇସିସିର କରୋନା ଗାଇଡ୍‌ ଲାଇନ୍‌

ଆଇସିସିର କରୋନା ଗାଇଡ୍‌ ଲାଇନ୍‌

25

ଦୁବାଇ :କୋଭିଡ୍‌-୧୯ ପାଇଁ ପ୍ରସ୍ତାବିତ ଗାଇଡ୍‌ଲାଇନ୍‌ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଦ୍ୱାରା ମଙ୍ଗଳବାର ଗୃହୀତ ହୋଇଯାଇଛି। ଫଳରେ ଏଣିକି ଏକ ଟେଷ୍ଟ ମ୍ୟାଚ ବେଳେ ଯଦି କୌଣସି ଖେଳାଳିଙ୍କ ନିକଟରେ କରୋନା ଲକ୍ଷଣ ଦେଖାଦିଏ, ସେ କ୍ଷେତ୍ରରେ ସମ୍ପୃକ୍ତ ଦଳ ଖେଳାଳି ବଦଳ କରିପାରିବ। ବଲ୍‌କୁ ଚକ୍‌ଚକ୍‌ କରିବା ଲାଗି ଯଦି କୌଣସି ଖେଳାଳି ଛେପ ବ୍ୟବହାର କରୁଥିବା ଦେଖିବାକୁ ମିଳେ ସାମୟିକ ବାସନ୍ଦ ସମ୍ମୁଖୀନ ହେବେ। ସେହିପରି ଦ୍ୱିପାକ୍ଷିକ ସିରିଜରେ ଅଣ-ନିରପେକ୍ଷ ଅମ୍ପାୟାର ବ୍ୟବହାର ପାଇଁ ଅନୁମତି ମିଳିଛି। ବର୍ତ୍ତମାନ ମହାମାରୀ ଯୋଗୁ ଅନ୍ତର୍ଜାତୀୟ ଯାତ୍ରା ଏକ ଚ୍ୟାଲେଞ୍ଜ ହୋଇଥିବାରୁ ତାହକୁ ଦୃଷ୍ଟିରେ ରଖି ଏହା କରାଯାଇଛି। କୌଣସି ଏକ ଟେଷ୍ଟ ମ୍ୟାଚ୍‌ ବେଳେ ଜଣେ ଖେଳାଳିଙ୍କ ନିକଟରେ କୋଭିଡ୍‌-୧୯ ଲକ୍ଷଣ ଦେଖା ଦେଲେ ମ୍ୟାଚ ରେଫରିଙ୍କ ଅନୁମୋଦନ କ୍ରମେ ସମ ଦକ୍ଷତା ସମ୍ପନ୍ନ ଖେଳାଳିଙ୍କୁ ବଦଳ ପାଇଁ ଅନୁମତି ମିିଳିବ। କିନ୍ତୁ କୋଭିଡ୍‌-୧୯ ପାଇଁ ଉଦ୍ଦିଷ୍ଟ ଏହି ନିୟମ ଅନ୍ତର୍ଜାତୀୟ ଦିନିକିଆ କିମ୍ବା ଅନ୍ତର୍ଜାତୀୟ ଟି୨୦ କ୍ଷେତ୍ରରେ ପ୍ରଯୁଜ୍ୟ ହେବ ନାହିଁ। ଖେଳାଳିମାନଙ୍କ ଜର୍ସିରେ ୩୨ଇଞ୍ଚ ବିଶିଷ୍ଟ ଏକ ଲୋଗୋ ବ୍ୟବହାର ପାଇଁ ମଧ୍ୟ ଅନୁମତି ମିଳିଛି। ଏହାଦ୍ୱାରା ମହାମାରୀ ଯୋଗୁ ଆର୍ଥିକ ସଂକଟରେ ପଡ଼ିଥିବା କ୍ରିକେଟ ବୋର୍ଡଗୁଡ଼ିକ ବ୍ୟବସାୟିକ ଫାଇଦା ହାସଲ କରିପାରିବେ। କୋଭିଡ୍‌-୧୯ ଯୋଗୁ ଖେଳ ଆରମ୍ଭ କରାଗଲେ ଖେଳାଳି ଓ ମ୍ୟାଚ ଅଫିସିଆଲଙ୍କ ସ୍ବାସ୍ଥ୍ୟ ସୁରକ୍ଷା ଏକ ରିସ୍କ ହୋଇଥିବାରୁ ଅନିଲ କୁମ୍ବଲେଙ୍କ ନେତୃତ୍ୱାଧୀନ କ୍ରିକେଟ କମିଟି କେତେକ ନିୟମାବଳୀ କାର୍ଯ୍ୟକାରୀ କରିବା ଲାଗି ସୁପାରିସ କରିଥିଲା।