Home ରାଜ୍ୟ ପୁଣି ସୃଷ୍ଟି ହେଉଛି ଦକ୍ଷିଣପଶ୍ଚିମ ବଙ୍ଗୋପସାଗରରେ ଲଘୁଚାପ ,୧୫ ତାରିଖ ବେଳକୁ ବାତ୍ୟାରେ ପରିଣତ !

ପୁଣି ସୃଷ୍ଟି ହେଉଛି ଦକ୍ଷିଣପଶ୍ଚିମ ବଙ୍ଗୋପସାଗରରେ ଲଘୁଚାପ ,୧୫ ତାରିଖ ବେଳକୁ ବାତ୍ୟାରେ ପରିଣତ !


ଭୁବନେଶ୍ୱର : ପୁଣି ଏକ ଦକ୍ଷିଣପଶ୍ଚିମ ବଙ୍ଗୋପସାଗରରେ ମାଡି ଆସୁଛି । ତେବେ ଏହି ଲଘୁଚାପ ୧୦ ତାରିଖ ବେଳକୁ ସ୍ପଷ୍ଟ ହେବା ସହିତ ୧୩ ତାରିଖ ବେଳକୁ ଗଭୀର ଅବପାତର ରୂପ ନେବ। ଏବଂ ୧୫ ତାରିଖ ବେଳକୁ ବାତ୍ୟାରେ ପରିଣତ ହୋଇ ଉତ୍ତର ପଶ୍ଚିମ ଦିଗରେ ଗତି କରିବ। ପୂର୍ବ ଓ ଦକ୍ଷିଣ ଭାରତ ଉପକୂଳରେ ବାତ୍ୟା ଲ୍ୟାଣ୍ଡଫଲ୍ କରିବ। ତେବେ କେଉଁ ରାଜ୍ୟ ଉପକୂଳକୁ ଛୁଇଁବ ତାହା ଏ ପର‌୍ୟ୍ୟନ୍ତ ଜଣାପଡ଼ୁ ନାହିଁ। ତଥାପି ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପରେ ଏହାର ପ୍ରଭାବ ରହିପାରେ। ଆସନ୍ତା ୩ରୁ ୪ ଦିନ ମଧ୍ୟରେ ଲଘୁଚାପର ଗତି ନେଇ ସ୍ପଷ୍ଟ ଚିତ୍ର ଜଣାପଡ଼ିବ ବୋଲି ପାଣିପାଗ ବିଶେଷଜ୍ଞମାନେ କହିଛନ୍ତି।
ସେପଟେ ଭାରତୀୟ ପାଣିପାଗ ବିଭାଗ ପୂର୍ବାନୁମାନ କହୁଛି ଯେ ଆସନ୍ତା ୪୮ ଘଣ୍ଟା ମଧ୍ୟରେ ଦକ୍ଷିଣ ପୂର୍ବ ବଙ୍ଗୋପସାଗର ଓ ଏହା ସଂଲଗ୍ନ ଭାରତ ମହାସାଗର ନିକଟରେ ଲଘୁଚାପ ବଳୟ ସୃଷ୍ଟି ହେବ। ଅନ୍ୟପଟେ ଅନ୍ତର୍ଜାତୀୟ ପାଣିପାଗ ଏଜେନ୍ସିମାନଙ୍କ ଆକଳନ ହେଉଛି ଯେ ୧୩ ତାରିଖ ମଧ୍ୟରେ ଲଘୁଚାପ ସୃଷ୍ଟି ହୋଇ ,ଅବପାତରେ ପରିଣତ ହେବ। ପ୍ରଭାବରେ ଆଣ୍ଡାମାନ ନିକୋବର ଦୀପପୁଞ୍ଜରେ ପ୍ରବଳ ବର୍ଷା ଲାଗିରହିବ। ଏଥିସହ କେରଳ, କର୍ଣ୍ଣାଟକ, ତାମିଲନାଡ଼ୁ, ପଣ୍ଡିଚେରି, ଲାକ୍ଷାଦୀପ, ଉପକୂଳ ଆନ୍ଧ୍ରପ୍ରଦେଶ ଉପରେ ବି ପ୍ରଭାବ ରହିବ। ୧୪ ତାରିଖ ବେଳକୁ ଅଧିକ ଘନୀଭୂତ ହୋଇ ବାତ୍ୟା ରୂପ ନେଇପାରେ। କର୍ଣ୍ଣାଟକ, ଆନ୍ଧ୍ରପ୍ରଦେଶ ଓ ଦକ୍ଷିଣ ଓଡ଼ିଶା ଉପକୂଳ ଆଡ଼କୁ ଆସିବାର ସମ୍ଭାବନା ଅଧିକ ରହିଛି।

ସେପଟେ ଆଉ ଜଣେ ଓଡ଼ିଶା କୃଷି ଓ ବୈଷୟିକ ବିଶ୍ବବିଦ୍ୟାଳୟ କୁଳପତି ତଥା ପାଣିପାଗ ବିଶେଷଜ୍ଞ ସୁରେନ୍ଦ୍ରନାଥ ପଶୁପାଳକଙ୍କ କହିବା କଥା ହେଲା ଦକ୍ଷିଣ ବଙ୍ଗୋପସାଗରରେ ସୃଷ୍ଟି ହେବାକୁ ଥିବା ଲଘୁଚାପ କ୍ରମଶଃ ଉତ୍ତର ଦିଗକୁ ଗତି କରିବ। ପ୍ରଭାବରେ ଆଣ୍ଡାମାନ ନିକୋବରରେ ପ୍ରବଳ ବର୍ଷା ଲାଗିରହିବ। ଅଧିକ ଘନୀଭୂତ ହୋଇ ତାହା ମିଆଁମାର ଆଡ଼କୁ ଯିବାର ସମ୍ଭାବନା ରହିଛି। ପାଣିପାଗ ବିଶେଷଜ୍ଞ ଶରତ ସାହୁ କହିଛନ୍ତି ଯେ ଲଘୁଚାପ କେଉଁ ଆଡ଼େ ଗତି କରିବ ଏବେ କହିବା କଷ୍ଟକର। ତଥାପି ଲଘୁଚାପର ପ୍ରଭାବ ୧୪ରୁ ୧୭ ପର‌୍ୟ୍ୟନ୍ତ ଓଡ଼ିଶା ଉପକୂଳରେ ପଡ଼ିବ। ଦକ୍ଷିଣ ଓଡ଼ିଶାରେ ବର୍ଷା ହେବା ସହିତ ଉପକୂଳ ଓଡ଼ିଶାରେ ମଧ୍ୟ ବର୍ଷାର ପ୍ରଭାବ ରହିବ।