Home ଦେଶ- ବିଦେଶ ପ୍ରଧାନମନ୍ତ୍ରୀ ମୋଦୀଙ୍କ ବଡ ଘୋଷଣା : ମେ ୩ ଯାଏଁ ବଢିଲା ଲକଡାଉନ୍

ପ୍ରଧାନମନ୍ତ୍ରୀ ମୋଦୀଙ୍କ ବଡ ଘୋଷଣା : ମେ ୩ ଯାଏଁ ବଢିଲା ଲକଡାଉନ୍

ନୂଆଦିଲ୍ଲୀ, ୧୪|୦୪:   ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ସମ୍ବୋଧିତ କରିଛନ୍ତି । ଏହାସହ ସେ ଏକ ବଡ ଘୋଷଣା କରିଛନ୍ତି । ଦେଶରେ ଗତ ମାର୍ଚ୍ଚ ୨୫ରୁ ଲାଗୁ ହୋଇଥିବା ଲକଡାଉନକୁ ମେ ୩ ଯାଏଁ ବୃଦ୍ଧି କରାଯାଇଥିବା ସେ କହିଛନ୍ତି । ଦେଶବାସୀଙ୍କ ହିତକୁ ଦେଖି ଏହି ନିଷ୍ପତ୍ତି ନିଆଯାଇଥିବା ସେ କହିଛନ୍ତି ।

ସାରାଦେଶରେ କରୋନା ସ୍ଥିତିକୁ ଦେଖି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶକୁ ୨୧ଦିନିଆ ଲକ୍ଡାଉନ୍ ଘୋଷଣା କରିଥିଲେ । ଯାହା ମାର୍ଚ୍ଚ ୨୫ରୁ ଆରମ୍ଭ ହୋଇ ଅପ୍ରେଲ୍ ୧୪ପର୍ଯ୍ୟନ୍ତ ଥିଲା । ତେବେ ଗତ ୨୬ଦିନ ମଧ୍ୟରେ ଦେଶବାସୀଙ୍କୁ ଚାରିଥର ସମ୍ବୋଧନ କରିଛନ୍ତି ।

ମୋଦୀ କହିଛନ୍ତି ଯେ, କରୋନା ମୁକାବିଲା ଭାରତ ଭଲ ଭାବେ କରୁଛି । ଦେଶବାସୀଙ୍କ ତ୍ୟାଗ ପାଇଁ ଭାରତ କରୋନା ସଂକ୍ରମଣକୁ କମ କରିଛି । ଜନତା ଦେଶକୁ ରକ୍ଷା କରିଛନ୍ତି । ଅନେକ ଅସୁବିଧାରେ ମଧ୍ୟ ଜନତା ସାମ୍ନା କରୁଛନ୍ତି । ଏଥିପାଇଁ ମୋଦୀ ଜନତାଙ୍କୁ ଧନ୍ୟବାଦ ଦେଇଛନ୍ତି । ଆଜି ବାବା ସାହେବ ଆମ୍ବେଦକରଙ୍କ ଜନ୍ମଦିନରେ ଏହା ହେଉଛି ପ୍ରକୃତ ଶ୍ରଦ୍ଧାଞ୍ଜଳି । ଦେଶର ଭିନ୍ନ ପ୍ରାନ୍ତରେ ଉତ୍ସବ ପାଳନ ସମୟରେ ମଧ୍ୟ ଜନତା ସଂଯମତା ରକ୍ଷା କରୁଛନ୍ତି । ସେମାନେ ଘରେ ରହି ହିଁ ଏହାକୁ ପାଳନ କରୁଛନ୍ତି । ଫଳରେ ଅନ୍ୟ ଦେଶ ତୁଳନାରେ ଭାରତ ସଂକ୍ରମଣ ରୋକିବା ପାଇଁ ପ୍ରୟାସ କରିଛି । ବିମାନ ବନ୍ଦରରେ ସ୍କ୍ରିନିଂ, ବିଦେଶୀଙ୍କୁ ୧୪ ଦିନର ଲକଡାଉନ ଆଦି ବ୍ୟବସ୍ଥା କରାଯାଇଥିଲା । କରୋନାର ୫୫୦ଟି ମାମଲା ଥିବା ବେଳେ ୨୧ ଦିନ ଲକଡାଉନ କରାଯାଇଥିଲା । ସମସ୍ୟା ବୃଦ୍ଧିକୁ ଅପେକ୍ଷା କରାଯାଇ ନଥିଲା ।

ମୋଦୀ ଆହୁରି କହିଛନ୍ତି ଯେ, ଏହି ସଙ୍କଟକୁ ଅନ୍ୟ କୌଣସି ଦେଶ ସହ ତୁଳନା କରିବା ଅନୁଚିତ । ଶକ୍ତିଶାଳୀ ଦେଶ ଅନୁସାରେ ଭାରତର ସ୍ଥିତି ଭଲ ରହିଛି । ଗୋଟିଏ ମାସ ପୂର୍ବରୁ ଅନେକ ଦେଶ କରୋନା ସଂକ୍ରମଣ ମାମଲାରେ ଭାରତ ସହ ସମାନ ଥିଲେ । କିନ୍ତୁ ଏବେ ସେହି ଦେଶରେ କରୋନା ତାଣ୍ଡବ ରଚିଛି । ୨୫ରୁ ୩୦ ଗୁଣା ବୃଦ୍ଧି ପାଇଛି । ହଜାର ହଜାର ବ୍ୟକ୍ତି ପ୍ରାଣ ହରାଉଛନ୍ତି । ତେବେ ଭାରତ ନେଇଥିବା କଡା ନିଷ୍ପତ୍ତି ପାଇଁ ସ୍ଥିତି ଭଲ ରହିଛି । ସାମାଜିକ ଦୂରତା ଓ ଲକଡାଉନ ଜରୁରୀ ଅଟେ । ଆର୍ଥିକ ଦୃଷ୍ଟିରୁ ଏହା ମହଙ୍ଗା ହେଲେ ମଧ୍ୟ ଭାରତବାସୀଙ୍କ ଜୀବନ ଆଗରେ ଏହାର ତୁଳନା ନାହିଁ । ଏହି ପ୍ରୟାସ ସତ୍ୱେ କରୋନା ଦ୍ରୁତ ଗତିରେ ବ୍ୟାପିବାରେ ଲାଗିଛି । ଯାହା ସରକାରଙ୍କୁ ସତର୍କ କରିଛି । ଭାରତରେ ମଧ୍ୟ କରୋନା ଲଢେଇ ପାଇଁ ରାଜ୍ୟ ସହ ଆଲୋଚନା ହୋଇଛି । ଅନେକ ଲକଡାଉନକୁ ବୃଦ୍ଧି କରିବା ପାଇଁ କହିଛନ୍ତି । କେତେକ ଏହାକୁ ଲାଗୁ ମଧ୍ୟ କରିଦେଇଛନ୍ତି । ସମସ୍ତଙ୍କ ପରାମର୍ଶକୁ ନଜରରେ ରଖି ଭାରତରେ ଲକଡାଉନକୁ ମେ ୩ ଯାଏଁ ବୃଦ୍ଧି କରାଯାଇଛି ।