Home ରାଜ୍ୟ ମହାପ୍ରଭୁଙ୍କ ନାଗାର୍ଜୁନ ବେଶ ପଛରେ ରହିଛି ଏମିତି ରହସ୍ୟ

ମହାପ୍ରଭୁଙ୍କ ନାଗାର୍ଜୁନ ବେଶ ପଛରେ ରହିଛି ଏମିତି ରହସ୍ୟ

ପୁରୀ: ଝଲସିବେ ମହାବାହୁ, ଝଲସିବ ରତ୍ନ ସିଂହାସନ। ରାତି ପାହିଲା ବେଳକୁ ରତ୍ନ ସିଂହାସନରେ ଦୁର୍ଲ୍ଲଭ ନାଗାର୍ଜୁନ ବେଶରେ ସଜେଇ ହୋଇ ସାରିଥିବେ ମହାପ୍ରଭୁ। ଜଗନ୍ନାଥ-ବଳଭଦ୍ରଙ୍କୁ ଯୋଦ୍ଧା ବେଶରେ ସଜ୍ଜିତ କରିବାକୁ ସମ୍ପୂର୍ଣ୍ଣ ପ୍ରସ୍ତୁତ।

ବେଶ ପରିପାଟି ସହ ୧୬ ପ୍ରକାରର ପାରମ୍ପାରିକ ଯୁଦ୍ଧାସ୍ତ୍ର ଯାହା ମଧ୍ୟରେ ରହିଛି ଢେଣୁ, ଶିଙ୍ଗା, ତୂଣୀର, ବାଘନଖ, ଖଣ୍ଡା ଓ ମସ୍ତକରେ ଶୋଭିତ ହାଣ୍ଡିଆ। ବେଶ ସତ୍ତ୍ୱାଧିକାରୀ ହରଚଣ୍ଡୀ ସାହି ଚକ୍ରକୋଟ ବଳରାମ ଖୁଣ୍ଟିଆଙ୍କ ଘରୁ ଆଜି ରାତି ଦୁଇଟାରୁ ତିନିଟା ଭିତରେ ପାଟ ପଟୁଆରେ ଶ୍ରୀମନ୍ଦିର ଅଭିମୁଖେ ବାହାରିବ ଏସବୁ ବେଶ ସରଞ୍ଜାମ।

କାହିଁକି ହୁଏ ନାଗାର୍ଜୁନ ବେଶ ହୁଏ ?

ଜଗନ୍ନାଥ ସଂସ୍କୃତି ଗବେଷକ ପଣ୍ଡିତ ସୂର୍ଯ୍ୟନାରାୟଣ ରଥଶର୍ମାଙ୍କ କହିବାନୁସାରେ, ଏହା ଯୁଦ୍ଧ ସ୍ମାରକୀ ବେଶ। ତିଥି ଅନୁସାରେ ବେଶେ ପଡ଼ୁଥିବାରୁ ଏହାକୁ ତିଥି ଜନିତ ବେଶ। ପଞ୍ଚକ ବଢ଼ା ତିଥି ପଡ଼ିଲେ  ନାଗାର୍ଜୁନ ବେଶ ହୋଇଥାଏ।

ପଞ୍ଚକ ୫ ଦିନ, ଏକାଦଶୀ ଠାରୁ ପୂର୍ଣ୍ଣମୀ ପର୍ଯ୍ୟନ୍ତ। କିନ୍ତୁ ଏକାଦଶୀ ଦିନ ଏହି ବେଶ ହୋଇପାରିବ ନାହିଁ। କାରଣ ବଢ଼ା ତିଥି ପଡ଼ିବନି। ଦ୍ୱାଦଶୀ, ତ୍ରୟୋଦଶୀ ଓ ଚତୁର୍ଦଶୀରେ ବଢ଼ା ତିଥି ପଡ଼ିଥାଏ।

ଇତିହାସ କହେ ଗଙ୍ଗବଂଶର ରାଜା ଅନଙ୍ଗଭୀମ ଦେବ ଯୁଦ୍ଧରେ ପରାଜିତ ହୋଇ ମହାପ୍ରଭୁଙ୍କ ଚରଣରେ ଆଶ୍ରୀତ ହେଲେ। ଏହାପରେ ରାଜଗୁରୁଙ୍କ ପରାମର୍ଶରେ ରାଜା ଗୋଟେ କୋଟ ସ୍ଥାପନ କରି ମହାପ୍ରଭୁଙ୍କୁ ଆରାଧନା କରିଥିଲେ। ଯାହାର ନାମ ଚକ୍ରକୂଟ। ନାଗାର୍ଜୁନ ବେଶ ଏହି ଚକ୍ରକୁଟରେ ହିଁ ତିଆରି ହୋଇଛି। ଏହାପରେ  ମହାପ୍ରଭୂଙ୍କ ନିର୍ଦ୍ଦେଶରେ ଶତ୍ରୁଙ୍କୁ ପରାହତ କରିବା ପରେ ମହାପ୍ରଭୁଙ୍କୁ ଏହି ବେଶରେ ସଜେଇଥିଲେ ରାଜା। ସେହିଦିନ କାର୍ତ୍ତିକ ମାସ ପଞ୍ଚକର ବଢ଼ା ତିଥି ପଡ଼ିଥିଲା। ସେହିଦିନ ଠାରୁ ମହାପ୍ରଭୁଙ୍କ ଏହି ସାମରିକ ବେଶ ହୋଇ ଆସୁଛି। ଯଦି ଆସନ୍ତା ବର୍ଷ ବଢ଼ା ତିଥି ପଡ଼େ, ତେବେ ମହାପ୍ରଭୂଙ୍କର ନାଗାର୍ଜୁନ ବେଶ ହେବ ବୋଲି ସୂର୍ଯ୍ୟନାରାୟଣ ରଥଶର୍ମା କହିଛନ୍ତି।