Home ରାଜନୀତି ରାଜନୀତିରେ ସ୍ଲୋ ପଏଜନ ବନାମ ଅପରେସନ

ରାଜନୀତିରେ ସ୍ଲୋ ପଏଜନ ବନାମ ଅପରେସନ

ଭୁବନେଶ୍ୱର: ବର୍ତ୍ତମାନ ରାଜ୍ୟ ରାଜନୀତିରେ ସ୍ଳୋ ପଏଜନ ବନାମ ଅପରେସନ ଚର୍ଚ୍ଚା ଜୋର୍ ଧରିଛି । ବିଜୁବାବୁଙ୍କ ରାଜନୀତିରେ ପୂର୍ଣ୍ଣଚ୍ଛେଦ ଟାଣିବା ପାଇଁ ଏପରି ପଏଜନ ଦିଆଯାଇଥିଲା । ଯେଉଁଥିପାଇଁ ବିଜୁ ପଟ୍ଟନାୟକ ୧୯୯୫ ନିର୍ବାଚନରେ କୌଣସି କାରଣ ନ ଥାଇ ପରାଜୟ ସ୍ୱୀକାର କରିଥିଲେ । ବର୍ତ୍ତମାନ କିନ୍ତୁ ବିଜୁଙ୍କ ପୁତ୍ର ନବୀନ ପଟ୍ଟନାୟକ ଏକାଦି କ୍ରମେ ୧୮ବର୍ଷ ଧରି ମୁଖ୍ୟମନ୍ତ୍ରୀ ଆସନରେ ରହିଛନ୍ତି । ନବୀନଙ୍କ ପାଇଁ ସ୍ଳୋ ପଏଜନ ନୁହେଁ ବରଂ ଅପରେସନ କରିବାକୁ ବିଭିନ୍ନ ସମୟରେ ବିଭିନ୍ନ ନେତା ବାହାରିଛନ୍ତି । ଅତୀତରେ ନବୀନଙ୍କ ମୁଖ୍ୟ ପରାମର୍ଶଦାତା ସାଜିଥିବା ମାର୍ଗଦର୍ଶକ ପ୍ୟାରୀମୋହନ ମହାପାତ୍ର କରିଥିଲେ ଅପରେସନ । ଏହି ଅପରେସନକୁ ମିଡ୍ନାଇଟ ଅପରେସନ ଭାବେ ସାଧାରଣରେ ଅଦ୍ୟାବଧି କୁହାଯାଉଛି । ଏଭଳି ଅପରେସନ ଯେତେବେଳେ ପ୍ୟାରୀମୋହନ କରିଥିଲେ ସେତେବେଳେ ନବୀନ ଓଡ଼ିଶାରେ ଅନୁପସ୍ଥିତ ଥିଲେ । ପ୍ୟାରୀଙ୍କ ଅପରେସନରେ ଅତିଷ୍ଠ ହୋଇ ନବୀନ ତାଙ୍କ ଲଣ୍ଡନ ଗସ୍ତ କାଟ୍ଛାଣ୍ଟ କରି ଫେରି ଆସିଥିଲେ । ପ୍ୟାରୀମୋହନଙ୍କ ଅପରେସନ କୁଆଡ଼େ ଠିକ୍ ଥିଲା । ମାତ୍ର ନବୀନ ସେହି ଅପରେସନରେ ସାଜିଥିଲେ ବାଧକ । ଯେଉଁ ଡାକ୍ତର ( କଂଗ୍ରେସ ହାଇକମାଣ୍ଡ) ଙ୍କୁ ଧରି ପ୍ୟାରୀ ଏହି ଅପରେସନ କରିବାକୁ ଷଡ଼ଯନ୍ତ୍ର କରିଥିଲେ ସେହି ଡାକ୍ତର (କଂଗ୍ରେସ ହାଇକମାଣ୍ଡ)ଙ୍କୁ ପ୍ରଭାବିତ କରି ନବୀନ ଏହାକୁ ଅସଫଳ କରିଥିଲେ । କିନ୍ତୁ ବିଜୁଙ୍କ ସମୟରେ ବିଜୁଙ୍କର ଅତ୍ୟନ୍ତ ବିଶ୍ୱାସୀ ହୋଇ ୯୫ନିର୍ବାଚନରେ ଅଧିକାଂଶ ନିର୍ବାଚନମଣ୍ଡଳୀରେ ସ୍ୱାଧୀନ ପ୍ରାର୍ଥୀ ଦେଇ ଜନତାଦଳର ଭୋଟ ବ୍ୟବଧାନକୁ ହ୍ରାସ କରାଇବା କାରଣରୁ ବିଜୁବାବୁ ୯୫ନିର୍ବାଚନରେ ସଫଳ ହୋଇ ନ ଥିଲେ । ବର୍ତ୍ତମାନ ପ୍ୟାରୀଙ୍କ ପରେ ନବୀନଙ୍କୁ ଖୋଲାଖୋଲି ଅପରେସନ କରିବାକୁ ବାହାରିଛନ୍ତି ଦାମୋଦର ରାଉତ । ପ୍ୟାରୀଙ୍କ ଭଳି ଦାମ ମଧ୍ୟ ଗଢ଼ିଛନ୍ତି ନୂଆଦଳ । ପ୍ୟାରୀ ଯେଭଳି ବ୍ରହ୍ମାସ୍ତ୍ର ପ୍ରୟୋଗ କରିବେ ବୋଲି ତୁମ୍ବିତୋଫାନ କରୁଥିଲେ ଦାମ ମଧ୍ୟ ନବୀନଙ୍କ ଦୁର୍ନୀତିର ଖୁଲାସା କରିବେ ବୋଲି କହି ବୁଲୁଛନ୍ତି । ସେତେବେଳେ ପ୍ୟାରୀଙ୍କ ସଭାରେ ପ୍ରବଳ ଜନ ସମାବେଶ ହେଉଥିଲା । ପ୍ୟାରୀ ନବୀନଙ୍କ ଅତ୍ୟନ୍ତ ନିକଟତର ଥିବାରୁ ଓ ଦଳ ଏବଂ ପ୍ରଶାସନର ମଙ୍ଗ ଧରିଥିବାରୁ ପ୍ୟାରୀଙ୍କ ଅପରେସନରେ ନବୀନ ଗାଦିଚ୍ୟୁତ ହେବେ ବୋଲି ଧାରଣା ସୃଷ୍ଟି ହୋଇଥିଲା । କିନ୍ତୁ ୨୦୧୪ ନିର୍ବାଚନରେ ସେଭଳି କିଛି ଦେଖିବାକୁ ମିଳି ନ ଥିଲା । ବହୁ ଆଡ଼ମ୍ବରରେ ଲଘୁକ୍ରିୟା ଭଳି ପ୍ୟାରୀଙ୍କ ଜନମୋର୍ଚ୍ଚା ଦଳ ଜନମାନସରୁ ବିସ୍ମୃତ ହୋଇ ଯାଇଥିଲା । ବର୍ତ୍ତମାନ ଠିକ୍ ପ୍ୟାରୀଙ୍କ ଭଳି ଦାମ, ନବୀନଙ୍କ ଦୁର୍ନୀତିର ଖୁଲାସା କରିବେ ବୋଲି କହି ବୁଲୁଛନ୍ତି । ଦାମଙ୍କ ସଭାରେ ଢେର୍ ଜନସମାବେଶ ହେଉଛି । କିନ୍ତୁ କୃଷି କ୍ଷେତ୍ରରେ ଦୁର୍ନୀତି ଛଡ଼ା ଦାମ ଆଉ ସେଭଳି କିଛି ଗୁରୁତ୍ୱପୂର୍ଣ୍ଣ ଅଭିଯୋଗ ଆଣିନାହାନ୍ତି । ପ୍ୟାରୀଙ୍କ ଭଳି ବିଜେଡି ମାଠିଆ କଣା କରିବା ଲକ୍ଷ୍ୟରେ ଅଛନ୍ତି ଦାମ । କିନ୍ତୁ ଦାମଙ୍କ ଅପରେସନ ସଫଳ ହେବା ନେଇ ଶଙ୍କା ସାଧାରଣରେ ଚର୍ଚ୍ଚା ଜୋର୍ ହେଲାଣି । ମାତ୍ର ତାଙ୍କ ଅପରେସନ କିଭଳି ସଫଳ ହେବ ସେଥିରେ ସନ୍ଦେହ ବଢୁଛି । ଦାମ ଯେଉଁ ବିଜୁ ସମତାକ୍ରାନ୍ତି ଦଳ ଗଠନ କରିଛନ୍ତି ସେଥିରେ ସେ ପ୍ରଚାରକ ଅଛନ୍ତି । କିନ୍ତୁ ସଭାପତି ଅଛନ୍ତି ବ୍ରଜ ତ୍ରିପାଠୀ । ବ୍ରଜ ତ୍ରିପାଠୀ ନବୀନଙ୍କ ଯୋଗୁଁ ପୁରୀରୁ ସାଂସଦ ହୋଇ କେନ୍ଦ୍ରରେ ମନ୍ତ୍ରୀ ହେବାକୁ ସକ୍ଷମ ହୋଇଥିଲେ । ଠିକ୍ ସେହିଭଳି ଦାମ ମଧ୍ୟ ନବୀନଙ୍କ ଦୟାରୁ ଏରସମା ଓ ପାରାଦୀପରୁ ବିଧାୟକ ହୋଇ ରାଜ୍ୟରେ ମନ୍ତ୍ରୀ ହେବାକୁ ସକ୍ଷମ ହୋଇଥିଲେ । କିନ୍ତୁ ଏହି ଦୁଇଜଣ ବର୍ତ୍ତମାନ ନବୀନଙ୍କ ବିରୋଧରେ ରଣହୁଙ୍କାର ଦେବା ଆରମ୍ଭ କରିଛନ୍ତି । ବ୍ରଜଙ୍କ ଅଭିଯୋଗ ଯେତେ ଶାଣିତ ନୁହେଁ ତା’ଠାରୁ ଦାମଙ୍କ ଅଭିଯୋଗ ଅଧିକ ଶାଣିତ ହେବ ବୋଲି ଆଶା କରାଯାଉଛି । କିନ୍ତୁ ପ୍ୟାରୀଙ୍କ ବ୍ରହ୍ମାସ୍ତ୍ର ଭଳି ଦାମଙ୍କ ଦୁର୍ନୀତି ଯଦି ପାଣିଚିଆ ହୋଇଯିବ ତା ହେଲେ ପ୍ୟାରୀଙ୍କ ଭଳି ଦାମଙ୍କ ଅପରେସନ ସଫଳ ହେବ ନାହିଁ ବୋଲି ରାଜନୈତିକ ମହଲରେ ଏବେଠାରୁ ଚର୍ଚ୍ଚା ଆରମ୍ଭ ହେଲାଣି । ନିର୍ବାଚନ ଆହୁରି ଛ’ ମାସ ବିଳମ୍ବ ଅଛି । ଦାମ ଛ’ ମାସ ପାଇଁ କିଭଳି ବାଣ ଖଞ୍ଜୁଛନ୍ତି ତାହା ଦେଖିବାକୁ ରାଜନୀତିକ ମହଲରେ ଉତ୍ସୁକତା ବଢ଼ିଛି । ତା ନ ହେଲେ କେବଳ ଅଗିଜଳାକୁ ବାଇଗଣ ଫୋପାଡ଼ିବା ଭଳି ଘଟଣା ଘଟିବ ବୋଲି ଅଭିଜ୍ଞ ରାଜନୀତିଜ୍ଞମାନେ ଭବିଷ୍ୟବାଣୀ କରିବାକୁ ପଛାଇ ନାହାନ୍ତି ।