Home ରାଜନୀତି ବଢୁଛି ଆଶାୟୀଙ୍କ ସଂଖ୍ୟା : ଟିକେଟ କାହା ଭାଗ୍ୟରେ, ଜିତିବେ କିଏ?

ବଢୁଛି ଆଶାୟୀଙ୍କ ସଂଖ୍ୟା : ଟିକେଟ କାହା ଭାଗ୍ୟରେ, ଜିତିବେ କିଏ?

ଅନୁଗୁଳ : ୨୦୧୯ ନିର୍ବାଚନରେ କିଏ ଭୋଟରଙ୍କ ମନଜିଣି ଏ ଅଞ୍ଚଳରୁ ବିଧାୟକ ହେବେ ? ସେ ନେଇ ଭୋଟରଙ୍କ ମଧ୍ୟରେ ସଚେତନତା ଜାଗ୍ରତ କରିବାକୁ ପ୍ରମୁଖ ତିନିଦଳ ବିଜେଡି, ବିଜେପି ଓ କଂଗ୍ରେସ ମଧ୍ୟରେ ପ୍ରତିଦ୍ୱନ୍ଦ୍ୱିତା ଲାଗିରହିଛି । ପ୍ରଥମରେ ବିଜେଡିରେ ତିନିରୁ ଚାରି ଆଶାୟୀ ପ୍ରାର୍ଥୀଙ୍କ ନାମ ଲୋକମୁଖରେ ଓ ସୋସିଆଲ୍ ମିଡିଆରେ ଜୋର୍ଦାର ପ୍ରଚାରିତ ହେଉଛି । ସେମାନଙ୍କ ମଧ୍ୟରେ ଏବର ବିଧାୟକ ଶ୍ରୀ ସିଂହ, ପୂର୍ବତନ ନଗରପାଳ ଶକ୍ତିପ୍ରସାଦ ପଟ୍ଟନାୟକ ଓ ଢେଙ୍କାନାଳ ଅନୁଗୁଳ ଲୋକସଭା ସଦସ୍ୟ ତଥାଗତ ସତପଥୀଙ୍କ ଅନୁଗୋଳ ଜିଲ୍ଲା ପ୍ରତିନିଧି ଭକ୍ତି ପ୍ରସାଦ ଦାଶ ଏବଂ ଗତଥରର କଂଗ୍ରେସ ସାଂସଦ ପ୍ରାର୍ଥୀ ଓ ପୂର୍ବତନ ଢେଙ୍କାନାଳ ବିଧାୟକ ସୁଧୀର କୁମାର ସାମଲ । ତନ୍ମଧ୍ୟରୁ ବିଧାୟକ ରଜନୀକାନ୍ତ ସିଂହଙ୍କ ମୁତାବକ ସେ ତାଙ୍କର ସ୍ୱଚ୍ଛ ଭାବମୂର୍ତ୍ତି, ତାଙ୍କ ଦଳର ନେତା ଓ ମୁଖ୍ୟମନ୍ତ୍ରୀ ନବୀନ ବାବୁଙ୍କ ଛବିକୁ ନେଇ ନିର୍ବାଚନ ରଣାଙ୍ଗନରେ ଅବତୀର୍ଣ୍ଣ ହୋଇ ଜିତିବା ପାଇଁ ଆଶା ରଖିଛନ୍ତି । ସେହିପରି ଅନ୍ୟ ଦୁଇ ଆଶାୟୀଙ୍କ ମଧ୍ୟରେ ଉଭୟ ଲୋକମାନଙ୍କ ପାଖକୁ ଯାଇ ଓ ବିଧାୟକଙ୍କୁ ବାଦ୍ ଦେଇ ସଭାମାନ କରୁଥିବାର ଓ ଲୋକଙ୍କ ସମସ୍ୟା ଦୂର କରୁଥିବା ସ୍ପଷ୍ଟ ଚିତ୍ର ମିଳିୁଛି । ଏତଦ୍ ବ୍ୟତୀତ ବଅଁରପାଳ ଅଞ୍ଚଳରେ ଜନୈକ ଜିଲ୍ଲା ପରିଷଦ କିମ୍ବା ତାଙ୍କ ସମ୍ପର୍କୀୟ ମଧ୍ୟ ବିଧାୟକ ଟିକେଟ ପାଇଁ ଆଶାବାଦୀ ଥିବା ତାଙ୍କ ସମର୍ଥକଙ୍କ ମୁହଁରୁ ଶୁଣାଯାଉଛି । ସେହିପରି ଶ୍ରୀ ସାମଲ ବର୍ତ୍ତମାନ ନିଜର ପୈତୃକ ଗ୍ରାମରେ ନ ରହି ବଅଁରପାଳ ସନ୍ତ୍ରୀ ଛକସ୍ଥିତ ନିଜ ନୂତନ ଘରେ ରହୁଛନ୍ତି ଓ ତାଙ୍କ ସମର୍ଥକ ସବୁ ସମୟରେ ନିଜ ନେତାଙ୍କ ସହ ଯୋଗାଯୋଗରେ ମଧ୍ୟ ରହୁଛନ୍ତି । ପୂର୍ବତନ କଂଗେସ ଏମ୍ପି ପ୍ରାର୍ଥୀ ହିସାବରେ ଏ ଅଞ୍ଚଳରେ ତାଙ୍କର ସମର୍ଥକଙ୍କ ସଂଖ୍ୟା ମଧ୍ୟ ବଢ଼ିଛି । ଯେ କି କଂଗ୍ରେସ ଛାଡ଼ି ବିଜେଡିରେ ମୁଖ୍ୟମନ୍ତ୍ରୀଙ୍କ ଉପସ୍ଥିତିରେ ଯୋଗ ଦେଇଛନ୍ତି । ତେଣୁ ଦରକାର ପଡ଼ିଲେ ତାଙ୍କୁ ମଧ୍ୟ ବିଧାୟକ କିମ୍ବା ଏମ୍ପି ଟିକେଟ୍ ମିଳିପାରେ । ସମସ୍ତଙ୍କ ସମର୍ଥକ ନିଜ ନିଜ ପସନ୍ଦର ନେତାଙ୍କୁ ଟିକେଟ ମିଳିବା ପାଇଁ ଚେଷ୍ଟା କରୁଥିବା ଲକ୍ଷ୍ୟ କରାଯାଉଛି । ସେହିପରି ବିଜେପି ଦଳରେ ମଧ୍ୟ ତିନ ପ୍ରତିଯୋଗୀ ଆଶାୟୀ ଅଛନ୍ତି । ପ୍ରଥମେ ହେଲେ ୨୦୧୪ ନିର୍ବାଚନରେ ପ୍ରାର୍ଥୀ ଥିବା ମୀନକେତନ ଅମାନ୍ତ, ଦ୍ୱିତୀୟରେ ପୂର୍ବ ବିଧାନସଭା ନିର୍ବାଚନରେ କଂଗ୍ରେସ ଟିକେଟ୍ରୁ ଲଢ଼ି ଦ୍ୱିତୀୟ ସ୍ଥାନରେ ରହି ବିଜେଡି ପ୍ରାର୍ଥୀଙ୍କ ଠାରୁ ୨୦ ହଜାର ଭୋଟ ବ୍ୟବଧାନରେ ହାରିଥିବା ପ୍ରତାପ ଚନ୍ଦ୍ର ପ୍ରଧାନ , ଯେ କି ବର୍ତ୍ତମାନ ବିଜେପରେ ଯୋଗ ଦେଇ ଟିକେଟ ଆଶାୟୀ ଅଛନ୍ତି । ସେହିପରି ନୂଆ ଚେହେରା ଯୋଗୀବାବା ସୁକାନ୍ତ ନାଥ ମଧ୍ୟ ନିଜ ସମର୍ଥକଙ୍କ ସହ ବିଭିନ୍ନ ଅଞ୍ଚଳରେ ସଭା, ସୋସିଆଲ୍ ମିଡିଆରେ ଦେଖା ଦେଉଥିବା ବେଳେ ଅନୁଷ୍ଠାନଗୁଡ଼ିକର କାର୍ଯ୍ୟକ୍ରମରେ ଯୋଗ ଦେଉଥିବାର ଦେଖାଯାଉଛି । ବାବାଙ୍କ ସମର୍ଥକ ମଧ୍ୟ ବାବାଙ୍କୁ ଟିକେଟ ମିଳିବା ନେଇ ଆଶାବାଦୀ । ଏ ବିଷୟରେ ବାବା କୋଣସି ପ୍ରତିକ୍ରିୟା ଦେଇନଥିବା ବେଳେ ବିଜେପି ରାଜ୍ୟ ଶାଖା ବିଜୟ ସମ୍ଭାବ୍ୟତା ଉପରେ ରଖୁଛି ନଜର । କାହାକୁ ଟିକେଟ ମିଳିବ ତାହା ଉଚ୍ଚସ୍ତରୀୟ କମିଟି ଓ ଦଳର ଅଧ୍ୟକ୍ଷ ଶ୍ରୀ ଶାହଙ୍କ ଉପରେ ନିର୍ଭର କରୁଛି । ବିଜେପିରେ ମୁଖ୍ୟ ବାଧକ ତୈଳ, ଗ୍ୟାସ୍ଦର ବୃଦ୍ଧି ପ୍ରସଙ୍ଗ ଦଳକୁ ଅଡ଼ୁଆରେ ପକାଇପାରେ । ସେହିପରି କଂଗ୍ରେସରେ ମଧ୍ୟ ବିପ୍ଳବ ଜେନାଙ୍କ ବିଧାୟକ ଟିକେଟ କଥା ଟାଣ ହୋଇଥିବା ସ୍ଥଳେ ବିରୋଧୀ ପକ୍ଷର ଅନ୍ୟ କିଛି ଆଶାୟୀ ଭାବେ ଅଛନ୍ତି । ତନ୍ମଧ୍ୟରେ କଂଗ୍ରେସର ପୁରୁଣା ନେତା ସଂଗ୍ରାମ ମିଶ୍ର ଅନ୍ୟତମ । ତାଙ୍କ ବିଷୟରେ ଚର୍ଚ୍ଚା ଜୋର୍ ଧରିଛି । କାରଣ ଆଜିକାଲି ସେ ବିପ୍ଳବ ଜେନାଙ୍କ ସଭାରେ ଦେଖାଯାଉ ନାହାନ୍ତି । ଅପର ପକ୍ଷରେ ଅନୁଗୋଳ ବ୍ଲକ୍ ଓ ସଦରରୁ ମଧ୍ୟ କଂଗ୍ରେସ ବିଧାୟକ ପ୍ରାର୍ଥୀ ହେବା ନେଇ କେତେକ ଆଶାୟୀ ଥିବା ଚର୍ଚ୍ଚା ହେଉଛି । ବିଜେଡିରେ ମୁଖ୍ୟ ପ୍ରସଙ୍ଗ ଡମ୍ପିଂୟାର୍ଡ ବିବାଦ, ନାଲ୍କୋ ଆଲୁମିନିୟମ୍ କାରଖାନାରେ ୨୦୦ ନାଲ୍କୋ ସ୍ପୋନ୍ସର୍ଡ ଏଲ୍ଏପି ଆଇଟିଆଇଙ୍କୁ ନିଯୁକ୍ତି ପ୍ରଭୃତି ପ୍ରସଙ୍ଗ ନିର୍ବାଚନ ପ୍ରଚାରରେ ବାଧକ ହୋଇପାରେ । ସେହିପରି କଂଗ୍ରେସରେ ନୂଆମୁହଁ ଓ ଯୁବଶକ୍ତିର ଅଭାବ ଏବଂ ପୂର୍ବତନ କଂଗ୍ରେସ ବିଧାୟକ ପ୍ରାର୍ଥୀଙ୍କ ବିଜେପିରେ ଯୋଗଦାନ ଅଡ଼ୁଆରେ ପକାଇପାରେ, ମାତ୍ର ଜିଲ୍ଲା ସଭାପତି ବିପ୍ଳବଙ୍କ କହିବା ମୁତାବକ ସେ ଏଥରର ନିର୍ବାଚନ ବୈତରଣୀ ପଞ୍ଚାୟତ ଭୋଟରଙ୍କ ଆସ୍ଥାରେ ଜିତିବେ । ତେଣୁ କାହା ଭାଗ୍ୟରେ କେଉଁ ଦଳର ଟିକେଟ ଅଛି ତାହା ସମୟ ହିଁ କହିବ ବୋଲି ତଥ୍ୟାଭିଜ୍ଞ ମହଲରେ ଆଲୋଚନା ଚାଲିଛି । ପ୍ରକାଶଥାଉକି ଅନୁଗୁଳ ବିଧାନସଭା ନିର୍ବାଚନ ମଣ୍ଡଳୀରେ ମୋଟ ଭୋଟର ସଂଖ୍ୟା ୨ଲକ୍ଷ ୯ହଜାର ୩୩୪ ଥିବ ବେଳେ ସେଥିରୁ ପୁରୁଷ ୧ଲକ୍ଷ ୧୦ହଜାର ୪୩୭ଜଣ ପୁରୁଷ ଭୋଟର ହୋଇଥିବାବେଳେ ମହିଳାଙ୍କ ସଂଖ୍ୟା ୯୮ହଜାର ୮୯୧ଜଣ ।