ନୂଆଦିଲ୍ଲୀ : ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଆଜି ହୁଏତ ମୋଦି ସରକାରକୁ ବଞ୍ଚାଇ ଦେଇପାରେ । କିନ୍ତୁ ୨୦୧୯ରେ ତାଙ୍କ ହାତରୁ କ୍ଷମତା ଅପସରି ଗଲେ ଆମେ ପ୍ରଧାନମନ୍ତ୍ରୀ ମୋଦିଜୀ ଓ ତାଙ୍କ ସରକାରଙ୍କ ଅଗଷ୍ଟା ୱେଷ୍ଟଲ୍ୟାଣ୍ଡ ସହିତ ଦୂରଭିସନ୍ଧି କେତେ ଅଛି, ତାହା ସଂପୂର୍ଣ୍ଣ ତଦନ୍ତ କରାଇବାକୁ ପ୍ରତିଶ୍ରୁତିବଦ୍ଧ । ଅଗଷ୍ଟା ପ୍ରସଙ୍ଗରେ କଂଗ୍ରେସ ପ୍ରତି ଇଙ୍ଗିତ ଆସିବା ପରେ ଦଳର ପ୍ରବକ୍ତା ଏପରି ଭାବରେ ଚାଲେଞ୍ଜ ରଖିଛନ୍ତି । ଆଲୋଚ୍ୟ ୩୬ଶହ କୋଟି ଭିଭିଆଇପି ହେଲିକପ୍ଟର ଦୁର୍ନୀତି ଅଭିଯୋଗର ତଦନ୍ତ କରାଯାଉଥିବା ବେଳେ ଅଭିଯୁକ୍ତ ୩ ମଧ୍ୟସ୍ଥିଙ୍କ ମଧ୍ୟରୁ ୫୪ବର୍ଷୀୟ ଖ୍ରୀଷ୍ଟିଆନ୍ ମିଚେଲ୍ ତାଙ୍କ ସ୍ୱୀକାରୋକ୍ତି ବେଳେ ଶ୍ରୀମତୀ ଗାନ୍ଧୀଙ୍କ ନାମ ସହିତ ଆର୍ ନାମଧାରୀ ଜଣେ ବିଶିଷ୍ଟ ବ୍ୟକ୍ତି ଯେ କି, ଜଣେ ଇଟାଲୀୟ ମହିଳାଙ୍କ ପୁତ୍ର ଏପରି ପ୍ରକାଶ କରିଥିଲେ । ବିଜେପି ନେୃତ୍ୱାଧୀନ ସରକାର ଗାନ୍ଧି ପରିବାରକୁ ଏପରି ନିଶାଣ କରୁଥିବା ବେଳେ କେନ୍ଦ୍ରୀୟ ସଂସ୍ଥାକୁ ବ୍ୟବହାର କରୁଛି ବୋଲି କଂଗ୍ରେସର ଜଣେ ନେତା ଉଦ୍ଗାରିବା ପରେ ୱେଷ୍ଟଲାଣ୍ଡ ମାମଲାର ତଦନ୍ତ କରାଇବା ଲାଗି ଜୋର୍ ଦେଇଥିଲେ କଂଗ୍ରେସର ପ୍ରବକ୍ତା ରଣଦୀପ ସୁରେଜୱାଲା । କଂଗ୍ରେସର ଅଭିଯୋଗ ଯେ, ମିଚେଲ ଜଣେ ବ୍ରିଟିଶ୍ ନାଗରିକ । ଆଗକୁ ସାଧାରଣ ନିର୍ବାଚନ ହେବାକୁ ଥିବାରୁ ସୋନିଆ ଗାନ୍ଧି ଓ ରାହୁଳ ଗାନ୍ଧିଙ୍କୁ ଉପଲକ୍ଷ୍ୟ କରି ଗାନ୍ଧି ପରିବାରକୁ ବିଜେପି ନେତୃତ୍ୱାଧୀନ ସରକାର ନିଶାଣ କରୁଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଛରେ ୬୯ହଜାର କୋଟି ଟଙ୍କାର ରାଫେଲ୍ କାରବାର ଦୁର୍ନୀତି ଅଭିଯୋଗ ରହିଛି । ଏପରି ବଡ଼ ଚୋରି ସହ ଯେଉଁ ବ୍ୟକ୍ତି ସଂପୃକ୍ତ ତାଙ୍କୁ ଛାଡ଼ିଦିଆଯିବ ନାହିଁ । ଅପରପକ୍ଷେ ବିଜେପିର ଜଣେ ନେତା କଂଗ୍ରେସକୁ ପ୍ରତି ଆକ୍ରମଣ କରିବାକୁ ପଛାଇ ଯାଇନାହିଁ । ଏହି ଆକ୍ରମଣରେ କୁହାଯାଇଛି ଜନସାଧାରଣଙ୍କ ଅର୍ଥଲୁଟ୍ର କାହାଣୀ ପଦାକୁ ଆସୁଛି । ସବୁକିଛି ଗୋଟିଏ ପରିବାର ପଛରେ ରହିଛି । କଂଗ୍ରେସ ନେତୃତ୍ୱାଧୀନ ୟୁପିଏ ସରକାର ଅମଳରେ ଦଳ ଜାତୀୟ ସୁରକ୍ଷା ସହିତ ସାଲିସ କରିଛି । ଦଳର ଅନ୍ୟଜଣେ ନେତା ରୋକଠୋକ କହିଛନ୍ତି ବର୍ତ୍ତମାନଗାନ୍ଧି ପରିବାର ପକ୍ଷେ ବୁଝାଇବାର ବେଳ ଆସିଛି । ଏକଦା ରାହୁଳ ଗାନ୍ଧି ମୋଦିଙ୍କୁ ଉପଲକ୍ଷ୍ୟ କରି କହିଥିଲେ ଚଉକିଦାର ହେଉଛନ୍ତି ଚୋର । ମିଚେଲ୍ଙ୍କ ସ୍ୱୀକାରୋକ୍ତି ପରେ ଜଣାପଡୁଛି ଚୋର ବହୁତ କୋଳାହଳ କରିବାକୁ ପଛାଏ ନାହିଁ । ତେବେ କଂଗ୍ରେସ ପ୍ରବକ୍ତା ପ୍ରଶ୍ନ ଉଠାଇଛନ୍ତି ୨୦୧୪ ଜୁଲାଇରେ ପ୍ରତିରକ୍ଷା ମନ୍ତ୍ରାଳୟ କାହିଁକି ଅଗଷ୍ଟା ୱେଷ୍ଟଲ୍ୟାଣ୍ଡ ଉପରେ ନିଷିଦ୍ଧାଦେଶ ଲଗାଇଲା? କାହିଁକି ସଂପୃକ୍ତ କମ୍ପାନୀକୁ ମେକ୍-ଇନ୍-ଇଣ୍ଡିଆ କାର୍ଯ୍ୟକ୍ରମରେ ଯୋଡ଼ିଲା? ଏହା କ’ଣ ସ୍ପଷ୍ଟ ନୁହେଁ ଯେ, ବର୍ତ୍ତମାନ ଚଉକିଦାର ଦାଗୀ ହୋଇଛନ୍ତି । ପ୍ରବର୍ତ୍ତନ ନିର୍ଦ୍ଦେଶାଳୟ ଅଗଷ୍ଟା ୱେଷ୍ଟଲ୍ୟାଣ୍ଡ ମାମଲାରେ ଅଭିଯୁକ୍ତ ମିଚେଲ୍ ଶ୍ରୀମତୀ ଗାନ୍ଧିଙ୍କ ନାମ ନେବା ଘଟଣା ଏହି ନିର୍ଦ୍ଦେଶାଳୟ ଅଦାଲତରେ ଉପସ୍ଥାପନ କରିବାର ଦିନକ ପରେ ଏନ୍ସିପି ମୁଖ୍ୟ ଶରତ ପାୱାର ବିଜେପି ଉପରେ କ୍ଷୁବ୍ଧ । ସରକାର କିଭଳି ସରକାରୀ ତଦନ୍ତକାରୀ ଦଳକୁ ଦୁରୁପଯୋଗ କରୁଛନ୍ତି ସେ ନେଇ ବିରୋଧୀ ଦଳଗୁଡ଼ିକ ସଂସଦରେ ସ୍ୱର ଉତ୍ତୋଳନ କରିବାକୁ ଏହି ନେତା ଆହ୍ୱାନ ଦେଇଥିଲେ ବି ବିଜେପି କହୁଛି ସତ ପଦାକୁ ଆସୁଛି । ବର୍ତ୍ତମାନ ଅଗଷ୍ଟ ୱେଷ୍ଟଲାଣ୍ଡ ମାମଲା ଆଧାରରେ ମିଚେଲ୍ ଶ୍ରୀମତୀ ଗାନ୍ଧିଙ୍କ ନାମ ନେବା ଘଟଣାର ଉଷ୍ମତା ଆଗାମୀ ସାଧାରଣ ନିର୍ବାଚନରେ ଦୁଇ ଦଳକୁ ଘମାଘୋଟ ଯୁଦ୍ଧ ଲାଗି ପ୍ରରୋଚିତ କରିବ ତାହାର ପୂର୍ବାଭାସ ଆରମ୍ଭ ହୋଇସାରିଛି କହିଲେ ଅତ୍ୟୁକ୍ତି ହେବ ନାହିଁ ।