Home ରାଜ୍ୟ ବଡଦିଅଁ ଅପେକ୍ଷାରେ ବଡଦାଣ୍ଡ

ବଡଦିଅଁ ଅପେକ୍ଷାରେ ବଡଦାଣ୍ଡ

ଆଜି କାଳିଆ ସାଆନ୍ତଙ୍କ ଘୋଷଯାତ୍ରା । ରଥ ସହ ପଥ ବି ପ୍ରସ୍ତୁତ ହୋଇସାରିଛି । ଅପେକ୍ଷା ତ ଆଉ କିଛି ସମୟର । ରତ୍ନବେଦୀ ରୁ ଜନ୍ମବେଦୀକୁ ରଥରେ ଗଡିଯିବେ ଚତୁର୍ଦ୍ଧା ମୂର୍ତ୍ତି । ଭାବ ବୁଝିବାକୁ ବଡଦାଣ୍ଡକୁ ଆସିବେ ବଡ ଠାକୁର, ଆଉ ଭକ୍ତଙ୍କ ଛଳଛଳ ଆଖିରୁ ବୁଝିନେବେ ଭକ୍ତଙ୍କ ଦୁଃଖ । ମା’ ଲକ୍ଷ୍ମୀଙ୍କୁ ଛାଡ଼ି ବଡ ଭାଇ ବଳଭଦ୍ର ଭଉଣୀ ମା’ ସୁଭଦ୍ରାଙ୍କୁ ସାଙ୍ଗରେ ଘେନି ବାହାରି ଯିବେ ମାଉସି ଘରକୁ । ଏଥିପାଇଁ ସମସ୍ତେ ଏବେ ପ୍ରସ୍ତୁତ । ସଙ୍ଖ ହୁଳହୁଳି ଧ୍ୱନିରେ ପ୍ରକମ୍ପିତ ହେବ ଶ୍ରୀକ୍ଷେତ୍ର ଆଉ କର୍ପୁର, ଚନ୍ଦନ ବାସ୍ନାରେ ମହକି ଉଠିବ ବଡ଼ଦାଣ୍ଡ ।
ନିଜର ପତିତପାବନ ନାମକୁ ସାର୍ଥକ କରିବା ପାଇଁ ବଡ଼ ଦେଉଳର ରତ୍ନଭଣ୍ଡାରର ଆକର୍ଷଣକୁ ତ୍ୟାଗ କରି ଭକ୍ତଙ୍କ ମେଳକୁ ଚାଲି ଆସିବାକୁ ମହାପ୍ରଭୁ ଶ୍ରୀଜଗନ୍ନାଥ ବ୍ୟସ୍ତ । ବଡ଼ଭାଇ ଶ୍ରୀବଳଦେବ, ଭଉଣୀ ସୁଭଦ୍ରାଙ୍କୁ ସାଙ୍ଗରେ ଘେନି ସମସ୍ତ ଅଲୌକିକତା ମଧ୍ୟରେ ଲୌକିକତାର ପରିପ୍ରକାଶ ପାଇଁ ମହାପ୍ରଭୁ ଶ୍ରୀଜଗନ୍ନାଥ ଆଜି ରଥଯାତ୍ରାରେ ଗୁଣ୍ଡିଚା ମନ୍ଦିରକୁ ବାହାରିଛନ୍ତି । ଏଥିପାଇଁ ଆଜି ଚଳଚଞ୍ଚଳ ହୋଇ ଉଠିଛି ବଡ଼ଦାଣ୍ଡ ।
ପହଣ୍ଡିରେ ଆସିବେ ଚତୁର୍ଦ୍ଧା ମୂର୍ତ୍ତି ଆଉ ସବୁ ନୀତି କାନ୍ତି ପରେ ଆରମ୍ଭ ହେବ ରଥଟଣା । ମହାପ୍ରଭୁ ତାଙ୍କ ଭାଇ ଭଉଣୀଙ୍କୁ ନେଇ ୯ ଦିନ ପର୍ଯ୍ୟନ୍ତ ଶ୍ରୀମନ୍ଦିର ଛାଡ଼ିବେ । ରୋଷ କରିବେ ମାଆ ଲକ୍ଷ୍ମୀ ଏମିତି ସବୁ ମାନବୀୟ ଲିଳାରେ ସମ୍ପର୍ଣ୍ଣ ହେବ ରଥଯାତ୍ରା । ଆଉ ଏସବୁ ପାଇଁ ଶ୍ରୀକ୍ଷେତ୍ର ଏବେ ଚଳ ଚଞ୍ଚଳ ।
ରଥାରୂଢ଼ ଠାକୁରଙ୍କ ଦର୍ଶନ ପାଇଁ ଭକ୍ତ ମାନଙ୍କ ମଧ୍ୟରେ ସୃଷ୍ଟି ହୋଇଛି ଅପୂର୍ବ ଉତ୍କଣ୍ଠା । ରଥଯାତ୍ରା ଉପଲକ୍ଷେ ପୁରୀରେ ଲକ୍ଷ ଲକ୍ଷ ଭକ୍ତଙ୍କ ସମାଗମ ହୋଇଛି । ସମସ୍ତେ ଅନେଇ ରହିଛନ୍ତି କେତେବେଳେ ତିନି ଠାକୁରଙ୍କ ରଥଟଣା ଆରମ୍ଭ ହେବ ଓ ରଥାରୂଢ଼ ଠାକୁରଙ୍କୁ ଦର୍ଶନ କରିବାର ସମୟ ଆସିବ ।