2011ଜନଗଣନା ଅନୁଯାୟୀ ଓଡ଼ିଶାରେ 57ଲକ୍ଷ ଚାଷୀ କୃଷି ଉପରେ ନିର୍ଭର କରୁଛନ୍ତି। ଏଥିରୁ 32.8ଲକ୍ଷ ଚାଷୀ କୃଷକ ଓ 24.20 ଲକ୍ଷ ଚାଷୀ କୃଷି ଶ୍ରମିକ। 2021ରେ ପରବର୍ତ୍ତୀ ଜନଗଣନା ପରେ ଅଧିକ ତଥ୍ୟ ଆସିବ। ତେବେ ଚାଷ ପ୍ରତି ଚାଷୀ ବିମୁଖ ହୋଇ ଚାଷ ଛାଡିନଥିବେ ବୋଲି କୃଷି ମନ୍ତ୍ରୀ କହିଛନ୍ତି ।

ତେବେ କୃଷିମନ୍ତ୍ରୀଙ୍କ ଉତ୍ତରରେ ବିରୋଧୀ କଂଗ୍ରେସ ବିଧାୟକମାନେ ଅସନ୍ତୋଷ ପ୍ରକାଶ କରିଥିଲେ । ବାଚସ୍ପତି ସୂର୍ଯ୍ୟନାରାୟଣ ପାତ୍ର ବିଭାଗୀୟ ମନ୍ତ୍ରୀଙ୍କୁ ନିର୍ଦ୍ଧିଷ୍ଟ ଉତ୍ତର ଦେବାକୁ ନିର୍ଦେଶ ଦେଇଥିଲେ । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଅଭିଯୋଗ କରିଥିଲେ ଯେ, ରାଜ୍ୟ ସରକାର କାଳିଆ ଯୋଜନାରେ 50 ଲକ୍ଷଙ୍କୁ ସହାୟତା ଦେଇଥିବା କହୁଥିବା ସମୟରେ ମନ୍ତ୍ରୀ ଗୃହରେ ତଥ୍ୟ ଦେଇପାରୁନାହାନ୍ତି ।ସେହିଭଳି କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା 2001 ଓ 2011 ମଧ୍ୟରେ କେତେ ଚାଷୀ କୃଷି କାର୍ଯ୍ୟ ଛାଡିଛନ୍ତି ବୋଲି ହୋଇଥିବା ମୂଳ ପ୍ରଶ୍ନର ଉତ୍ତର ଦେଇନାହାନ୍ତି । ଏହାର ଉତ୍ତରରେ କୃଷିମନ୍ତ୍ରୀ କହିଥିଲେ ଯେ, ଏବେ ତଥ୍ୟ ନାହିଁ, ମାନ୍ୟବର ସଦସ୍ୟଙ୍କୁ ସେ ଯୋଗେଇଦେବେ । ତେବେ ଏହା ରାଜ୍ୟର କୃଷି କ୍ଷେତ୍ର ସମ୍ପର୍କରେ ଅଧିକ ଅନୁଧ୍ୟାନ ପାଇଁ ବିଭାଗ ଏହି ତଥ୍ୟର ସମୀକ୍ଷା କରିବ ।

ଏଥିସହ ବିଭାଗୀୟ ମନ୍ତ୍ରୀ କହିଥିଲେ ଯେ, କୃଷି ଉଦ୍ୟୋଗରେ 934 ପ୍ରତ୍ୟକ୍ଷ 3736 ପରୋକ୍ଷ ଆତ୍ମନିଯୁକ୍ତି ପାଇଛନ୍ତି। କୃଷି ସେବା କେନ୍ଦ୍ର ଜରିଆରେ 2587 ପ୍ରତ୍ୟକ୍ଷ 10,348 ପରୋକ୍ଷ ଆତ୍ମନିଯୁକ୍ତି ପାଇଛନ୍ତି।