Home ରାଜ୍ୟ ଭୁଲ୍ ଇଞ୍ଜେକ୍ସନ ନେଲା ରୋଗୀ ଜୀବନ,ରୋଗୀ ମୃତ୍ୟୁ କୁ ନେଇ ଉତ୍ତେଜନା ଭଙ୍ଗାରୁଜା!

ଭୁଲ୍ ଇଞ୍ଜେକ୍ସନ ନେଲା ରୋଗୀ ଜୀବନ,ରୋଗୀ ମୃତ୍ୟୁ କୁ ନେଇ ଉତ୍ତେଜନା ଭଙ୍ଗାରୁଜା!


ବାଲେଶ୍ୱର ; ଭୁଲ ଇଞ୍ଜେକ୍ସନ ଯୋଗୁ ରୋଗୀ ମୃତ୍ୟୁ ଅଭିଯୋଗ । ଏଭଳି ଏକ ଦୁଃଖଦ ଘଟଣା ଘଟିଛି ବାଲେଶ୍ୱର ଜିଲ୍ଲା ମେଡିକାଲ କଲେଜ ଓ ହସ୍ପିଟାଲରେ । ଅଭିଯୋଗ ଅନୁସାରେ ସହଦେବଖୁଣ୍ଟା ଥାନା ଅନ୍ତର୍ଗତ ଦହପଡା ଗାଁର ମଧୁସୂଦନ ପ୍ରଧାନ ଗତକାଲି ରାତି ପ୍ରାୟ ୧୦ଟା ବେଳେ ଛାତିରେ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ବାଲେଶ୍ୱର ମେଡିକାଲ କଲେଜ ଓ ହସ୍ପିଟାଲକୁ ଅଣାଯାଇଥିଲା କିନ୍ତୁ ସେଠାରେ ତାଙ୍କୁ ଭୁଲ ଇଞ୍ଜେକ୍ସନ ଦିଆଯିବା ଯୋଗୁ ମୃତ୍ୟୁ ହୋଇଥିବା ସମ୍ପର୍କୀୟମାନେ ଅଭିଯୋଗ କରିଛନ୍ତି । ତେବେ ସମ୍ପର୍କୀୟଙ୍କ କହିବା ଅନୁସାରେ ମଧୂସୂଦନ ଡାକ୍ତରଖାନା ଆସିବାବେଳେ ସେତେ ଗୁରୁତର ନଥିଲେ କାରଣ ସେ ବାଇକରେ ବସି ମେଡିକାଲ ଆସିଥିଲେ । ତେବେ ଭୁଲ ଇଞ୍ଜେକ୍ସନ ହିଁ ତାଙ୍କୁ ଅଧିକ ଅସୁସ୍ଥ କରିବା ସହ ତାଙ୍କ ଜୀବନ ନେଇଛି ।
ତେବେ ମଧୂସୂଦନଙ୍କ ମୃତ୍ୟୁ ପରେ ତାଙ୍କ ସମ୍ପର୍କୀୟମାନେ ଡାକ୍ତରଖାନାରେ ପାଟିତୁଣ୍ଡ କରି ଭଙ୍ଗାରୁଜା କରିବା ସହ ଏହି ଘଟଣା ନେଇ ଥାନାରେ ଲିଖିତ ଅଭିଯୋଗ ମଧ୍ୟ କରିଛନ୍ତି । ଆଗକୁ ଯଦି ଅନ୍ୟମାନଙ୍କ ସହ ଏପରି ଘଟିବ ସେଥିପାଇଁ କେଉଁ ଇଞ୍ଜେକ୍ସନ ଦିଆଯାଇଥିଲା ଓ କାହିଁକି ଦିଆଯାଇଥିଲା ତାହା ସମସ୍ତେ ଜାଣିବା ଦରକାର ବୋଲି ପରିବାର ପକ୍ଷରୁ ଦାବି କରାଯାଇଛି । ତେବେ ଗଣ୍ଡଗୋଳକୁ ଦୃଷ୍ଟିରେ ରଖି ମେଡିକାଲରେ ପୋଲିସ ମୁତୟନ କରାଯାଇଛି ।
ଅନ୍ୟପଟେ ଡାକ୍ତର ଏହି ଅଭିଯୋଗକୁ ଖଣ୍ଡନ କରିବା ସହ ହୃଦଘାତରୁ ମଧୁସୂଦନଙ୍କ ମୃତ୍ୟୁ ହୋଇଥିବା କହିଛନ୍ତି ।