Home ଦେଶ- ବିଦେଶ ନାଗରିକତ୍ୱ ସଂଶୋଧନ ବିଲ୍‌ ପାସ୍‌

ନାଗରିକତ୍ୱ ସଂଶୋଧନ ବିଲ୍‌ ପାସ୍‌

165

ନୂଆଦିଲ୍ଲୀ : ନାଗରିକତ୍ୱ (ସଂଶୋଧନ) ବିଲ୍‌ (ସିଏବି) ପାର୍ଲାମେଣ୍ଟର ଅନୁମୋଦନ ଲାଭ କରିଛି। ରାଷ୍ଟ୍ରପତିଙ୍କ ସ୍ବୀକୃତି ପରେ ଏହା ଆଇନରେ ପରିଣତ ହେବ। ଏହାପରେ ପଡୋଶୀ ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନରେ ଧର୍ମୀୟ ବିଦ୍ୱେଷର ସମ୍ମୁଖୀନ ହୋଇ ଭାରତରେ ଆସି ରହିଥିବା ଅଣମୁସଲମାନମାନଙ୍କୁ ଭାରତୀୟ ନାଗରିକତ୍ୱ ମିଳିବ। ସୋମବାର ସିଏବି ଲୋକ ସଭାରେ ଗୃହୀତ ହୋଇଥିବାବେଳେ ବୁଧବାର ରାଜ୍ୟ ସଭାରେ ଦୀର୍ଘ ବିତର୍କ ପରେ ଧ୍ୱନି ଭୋଟରେ ପାରିତ ହୋଇଯାଇଛି। ବିଲ୍‌ ସପକ୍ଷରେ ୧୨୬ ଏମ୍‌ପି ଭୋଟ ଦେଇଥିବାବେଳେ ବିପକ୍ଷରେ ୧୦୭ଟି ଭୋଟ ଯାଇଥିଲା। ଶିବସେନା ଭୋଟଦାନ ପୂର୍ବରୁ କକ୍ଷତ୍ୟାଗ କରିଥିଲା। ବିଲ୍‌ ଉପରେ ତୃଣମୂଳ କଂଗ୍ରେସ ଆଣିଥିବା ୧୪ଟି ସଂଶୋଧନ ପ୍ରସ୍ତାବ ପୂର୍ବରୁ କାଟ୍‌ ଖାଇଯାଇଥିଲା। ବିଲ୍‌ ଗୃହୀତ ହୋଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାକୁ ଐତିହାସିକ ଦିନ ବୋଲି କହିଛନ୍ତି। ଅନ୍ୟପକ୍ଷରେ ଭାରତୀୟ ଇତିହାସରେ ଏହା ଏକ କଳାଦିବସ ବୋଲି କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ କହିଛନ୍ତି।
ନାଗରିକତ୍ୱ ସଂଶୋଧନ ବିଲ୍‌ ରାଜ୍ୟ ସଭାରେ ଉପସ୍ଥାପନ ହେବା ପରେ ଏହାକୁ ନେଇ ବିରୋଧୀ ତୁମ୍ବିତୋଫାନ କରିଥିଲେ। ଏହା ଅସାମ୍ବିଧାନିକ ଏବଂ ଧର୍ମ ନାମରେ ଶରଣାର୍ଥୀଙ୍କ ପ୍ରତି ପକ୍ଷପାତ କରାଯାଉଥିବା କଂଗ୍ରେସ ନେତୃତ୍ୱରେ ବିରୋଧୀ ଦଳଗୁଡ଼ିକ ଅଭିଯୋଗ କରିଥିଲେ। ବିଲ୍‌କୁ ନେଇ ଉତ୍ତରପୂର୍ବାଞ୍ଚଳ ସମେତ ସାରା ଦେଶରେ ବିରୋଧର ସ୍ବର ଜୋର୍‌ଦାର ହୋଇଥିବାବେଳେ ଏହା ପଛରେ ସରକାରଙ୍କର କୌଣସି ରାଜନୈତିକ ଅଭିସନ୍ଧି ନ ଥିବା ସ୍ବରାଷ୍ଟ୍ର ମନ୍ତ୍ରୀ ଅମିତ୍‌ ଶାହା କହିଥିଲେ। ମୁସଲମାନମାନଙ୍କର ଚିନ୍ତା କରିବାର କୌଣସି କାରଣ ନାହିଁ। ଭାରତୀୟ ମୁସଲମାନ ସୁରକ୍ଷିତ ଅଛନ୍ତି ଓ ସୁରକ୍ଷିତ ହୋଇ ରହିବେ ବୋଲି ସେ କହିଥିଲେ। ଯଦି ୫୦ ବର୍ଷ ପୂର୍ବରୁ ଏହି ବିଲ୍‌ ଅଣାଯାଇଥାନ୍ତା ତେବେ ଦେଶର ସ୍ଥିତି ଏଭଳି ହୋଇ ନ ଥାନ୍ତା। ସିଏବି ମାଧ୍ୟମରେ ସରକାର ଐତିହାସିକ ଭୁଲ୍‌କୁ ସଂଶୋଧନ କରୁଥିବା ସ୍ବରାଷ୍ଟ୍ରମନ୍ତ୍ରୀ କହିଥିଲେ।
ବିଲ୍‌ ଉପରେ ବିତର୍କ ଆରମ୍ଭ କରି କଂଗ୍ରେସ ନେତା ଆନନ୍ଦ ଶର୍ମା ଭାଜପାକୁ ଜୋରଦାର ସମାଲୋଚନା କରିଥିଲେ। କୌଣସି ରାଜନୈତିକ ଦଳର ଇସ୍ତାହାର ଭାରତର ସମ୍ବିଧାନ ଉପରେ ହୋଇ ନ ପାରେ ବୋଲି ସେ କହିଥିଲେ। ଅନ୍ୟପକ୍ଷରେ ଭାଜପା କହିଥିଲା, ଏହା ନାଗରିକତ୍ୱ ଆଇନରେ ସଂଶୋଧନ ଇସ୍ତାହାର ଆଧାରରେ ଜନାଦେଶ ପାଇଥିଲା। ପାକିସ୍ତାନ, ବାଂଲାଦେଶ ଓ ଆଫଗାନିସ୍ତାନରୁ ଧର୍ମୀୟ ବିଦ୍ୱେଷର ସମ୍ମୁଖୀନ ହୋଇ ଭାରତରେ ଆସି ଶରଣାର୍ଥୀ ଭାବେ ରହିଥିବା ହିନ୍ଦୁ, ଖ୍ରୀଷ୍ଟିୟାନ, ପାର୍ସୀ, ଜୈନ, ବୌଦ୍ଧ ଓ ଶିଖ୍‌ ଧର୍ମାବଲମ୍ବୀମାନଙ୍କୁ ଭାରତୀୟ ନାଗରିକତ୍ୱ ପ୍ରଦାନ କରିବା ଲାଗି ବିଲ୍‌ରେ ପ୍ରସ୍ତାବ ରହିଛି। ଏହା ବିଭାଜନକାରୀ, ଭେଦଭାବପୂର୍ଣ୍ଣ ଏବଂ ଭାରତୀୟ ସମ୍ବିଧାନର ମୌଳିକତାର ବିରୋଧୀ ବୋଲି ଆନନ୍ଦ ଶର୍ମା କହିଥିଲେ। ସବୁ ଦଳ ନିଜସ୍ବ ଇସ୍ତାହାର ଆଣିବାର ଅଧିକାର ରହିଛି। ତେବେ ତାହା ସମ୍ବିଧାନର ଊର୍ଦ୍ଧ୍ୱରେ ରହିପାରିବ ନାହିଁ ବୋଲି ବିରୋଧୀ ଦଳ ଉପନେତା କହିଥିଲେ। ଏହି ବିଲ୍‌ ପାର୍ଲାମେଣ୍ଟ ଗାଲରେ ଚାପୁଡ଼ା ସଦୃଶ ବୋଲି ପୂର୍ବତନ କେନ୍ଦ୍ରମନ୍ତ୍ରୀ ପି. ଚିଦାମ୍ବରମ କହିଥିଲେ। ଏହା ମାଧ୍ୟମରେ ସରକାର ହିନ୍ଦୁତ୍ୱ ଏଜେଣ୍ଡା ଆଡ଼େ ଆଗଉଛନ୍ତି। ଏଭଳି କପଟପୂର୍ଣ୍ଣ ବିଲ୍‌ ଜରିଆରେ ସେମାନେ ସମ୍ବିଧାନର ଏକ ଅଂଶକୁ ନଷ୍ଟ ଓ ଉଚ୍ଛେଦ କରିଦେବାକୁ ଚାହାନ୍ତି ବୋଲି ବରିଷ୍ଠ କଂଗ୍ରେସ ନେତା କହିଥିଲେ। ନ୍ୟାୟପାଳିକା ଏହାକୁ ବାତିଲ କରି ଭାରତ ଓ ଭାରତୀୟ ଚିନ୍ତାଧାରାକୁ ସୁରକ୍ଷା ଦେବ ବୋଲି ସେ ଆଶାବ୍ୟକ୍ତ କରିଥିଲେ। ବିଲ୍‌ରୁ ଶ୍ରୀଲଙ୍କାର ହିନ୍ଦୁ ଓ ଭୁଟାନର ଖ୍ରୀଷ୍ଟିଆନଙ୍କୁ କ’ଣ ପାଇଁ ବାଦ୍‌ ଦିଆଯାଇଛି ବୋଲି ଚିଦାମ୍ବରମ ଜାଣିବାକୁ ଚାହିଁଥିଲେ।
ସେହିପରି ତୃଣମୂଳ କଂଗ୍ରେସ ଏମ୍‌ପି ଡେରେକ୍‌ ଓ’ବ୍ରାଏନ୍‌ ବିଲ୍‌କୁ ଅସାମ୍ବିଧାନିକ କହିବା ସହ ଏହା ବିରୋଧରେ ଜନଆନ୍ଦୋଳନ ହେବ ବୋଲି ଚେତାବନୀ ଦେଇଥିଲେ। ଏହାକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରାଯିବ ବୋଲି ସେ କହିଥିଲେ। ନାଗରିକତ୍ୱ ବିଲ୍‌ ଏବଂ ଜାତୀୟ ନାଗରିକ ପଞ୍ଜିକା ମାଧ୍ୟମରେ ଶାସକ ଦଳ ପ୍ରକୃତ ଭାରତୀୟଙ୍କୁ ସେମାନଙ୍କ ଦେଶରୁ ତଡ଼ିଦେବାକୁ ଉଦ୍ୟମ କରୁଛି ବୋଲି ଡେରେକ୍‌ ଅଭିଯୋଗ କରିଥିଲେ। ବିଲ୍‌ ମାଧ୍ୟମରେ ଭାଜପା ପାକିସ୍ତାନର ପ୍ରତିଷ୍ଠାତା ମହମ୍ମଦ ଅଲି ଜିନ୍ନାଙ୍କ ସ୍ବପ୍ନକୁ ପୂରଣ କରୁଛି ବୋଲି ସମାଜବାଦୀ ପାର୍ଟି ଏମ୍‌ପି ଜାଭେଦ ଅଲି ଖାନ୍‌ କହିଥିଲେ।

 

ସମର୍ଥନ ଦେଲା ବିଜେଡି: ବିଧାନ ପରିଷଦ ଗଠନ ଲାଗି ସବୁଜ ସଙ୍କେତ

ଧର୍ମ ଆଧାରରେ ନାଗରିକତ୍ୱ ପ୍ରଦାନ ଲାଗି ଏନ୍‌ଡିଏ ସରକାର ଆଣିଥିବା ନାଗରିକତ୍ୱ (ସଂଶୋଧନ) ବିଲ୍‌କୁ ବିଜେଡି ରାଜ୍ୟ ସଭାରେ ସମର୍ଥନ ଦେଇଛି। ବିଲ୍‌ ଉପରେ ଆଲୋଚନା ପୂର୍ବରୁ ଅନୁଷ୍ଠିତ ରୁଦ୍ଧଦ୍ୱାର ବୈଠକରେ ସ୍ବରାଷ୍ଟ୍ରମନ୍ତ୍ରୀ ଅମିତ୍‌ ଶାହା ଓଡ଼ିଶାରେ ବିଧାନ ପରିଷଦ ଗଠନ ପାଇଁ ପ୍ରତିଶ୍ରୁତି ଦେଇଥିବା ଜଣାପଡିଛି। ଉଚ୍ଚ ସଦନରେ ବିଲ୍‌ ଆଲୋଚନାରେ ଭାଗନେଇ ବିଜେଡି ଏମ୍‌ପି ସସ୍ମିତ୍‌ ପାତ୍ର ସରକାରଙ୍କଠାରୁ ଏହା ଉପରେ ତିନୋଟି ସ୍ପଷ୍ଟୀକରଣ ଚାହିଁଥିଲେ। ବିଲ୍‌ରୁ ଶ୍ରୀଲଙ୍କାକୁ ବାଦ୍‌ ଦିଆଯିବାର କାରଣ କ’ଣ ବୋଲି ସେ ପଚାରିଥିଲେ। ଶ୍ରୀଲଙ୍କାରେ ବହୁସଂଖ୍ୟାରେ ହିନ୍ଦୁ ଓ ମୁସଲମାନ ଅତ୍ୟାଚାରିତ ହେଉଥିବାବେଳେ ଏହି ପଡୋଶୀ ଦେଶକୁ ବିଲ୍‌ ପରିସରଭୁକ୍ତ କରାଯିବା ଉଚିତ ବୋଲି ସମ୍ବିତ୍‌ ଓଡ଼ିଆରେ କହିଥିଲେ। ଏନ୍‌ଆର୍‌ସି ଏବଂ ନାଗରିକତ୍ୱ ସଂଶୋଧନ ବିଲ୍‌ ଦୁଇଟି ଭିନ୍ନ ପ୍ରସଙ୍ଗ। ସରକାର ମୁସଲମାନ ସମ୍ପ୍ରଦାୟଙ୍କ ମନରୁ ଭୟ ଦୂରକରିବା ଉଚିତ ବୋଲି ସେ ପ୍ରସ୍ତାବ ଦେଇଥିଲେ। ରାଜ୍ୟ ସଭାରେ ବିଜେଡି ବିଲ୍‌କୁ ବିରୋଧ କରୁ ବୋଲି ଏଆଇଟିଏମ୍‌ସି ଆହ୍ବାନ ଦେଇଥିଲା। ବିଜେଡି ଏବଂ ଜେଡିୟୁ ବିଲ୍‌କୁ ବିରୋଧ କରିବା ସମୟ ଆସିଛି। ଯଦି ସେମାନେ ଆଜି ବିରୋଧ ନ କରନ୍ତି ତେବେ ୨୦ ବର୍ଷ ପରେ ପିଲାମାନଙ୍କୁ କି ଉତ୍ତର ଦେବେ ବୋଲି ତୃଣମୂଳ କଂଗ୍ରେସ ଏମ୍‌ପି ଡେରେକ୍‌ ଓ’ବ୍ରାଏନ୍‌ ପ୍ରଶ୍ନ କରିଥିଲେ।